Үүсгэн байгуулагч А.Отгончимэг

Миний хувьд хоёр ойрхон амаржиж, ээж, эзэгтэйн үүрэгт ажлыг гэртээ дөрвөн жил хийсэн. Үр хүүхдээ өсгөн хүмүүжүүлэхийн сацуу хэрхэн амттай хоол хийхыг маш сайн сурсан. Сайн эзэгтэй байх гэж хэрэндээ л хичээсэн.

Өглөө, өдөр, орой бүр хүүхдүүддээ, нөхөртөө “юугаар, хэрхэн амт чанартай хоол бэлтгэн өгөх вэ” гэдэг бодол намайг шаналгаж байсан. Ингээд бага охиноо нэг нас хүргээд ажилдаа орлоо. Орой ирээд дахиад л хоолны асуудал.

Дэлгүүр гүйнэ. Өөхтэй хонины мах, муу махтай бууз банш. Би дэлгүүрээс зөвхөн идэхэд цэвэрхэн, хэрэглэхэд амар махны төрлийн бүтээгдэхүүн л хайдаг байв.

Учир нь мах байхад хачир, амтыг бол хүссэнээрээ хялбар шийдэх боломжтой. Энэ бүхний дараагаар “ер нь яагаад эрүүл цэвэрхэн, хэрэглэхэд хялбар хагас боловсруулсан хөлдөөсөн бүтээгдэхүүн байж болохгүй гэж” бодсон.

Ингээд бидний идэх дуртай гол махан хоол болох котлет, бөөрөнхий мах, баншийг “гэр/hоme style” аргаар хийж эхэлсэн.